Gera þarf samkomulag um skiptingu áunninna réttinda áður en taka lífeyris hefst en þó eigi síðar en fyrir 65 ára aldur og þá háð því, að sjúkdómar eða heilsufar sjóðfélaga hafi ekki dregið úr lífslíkum.
Samkomulag um skiptingu er gagnkvæm aðgerð þar sem hjón eða sambúðaraðilar veita hinu sama hlutfall réttinda sinna og skerðast þá réttindi sjóðfélagans sem því nemur. Skipting lífeyrisréttinda milli hjóna eða sambúðaraðila nær þó aðeins til þeirra réttinda sem hafa áunnist/munu ávinnast á meðan hjúskap eða sambúð varir eða varði og taka aðeins til ævilangs lífeyris en ekki til makalífeyris- eða örorkulífeyrisréttinda. Heimildin nær til allt að helmings lífeyrisréttindanna.
Skipting áunninna réttinda er byggð á aldri og kyni og getur því komið samanlagt út í mínus eða plús. Ástæðan er mismunandi ævilíkur eftir aldri og kyni. Því er mikilvægt að gefa sér tíma og kanna stöðu sína vel.
Til að samkomulag um skiptingu áunninna lífeyrisréttinda taki gildi þurfa báðir aðilar að undirrita samning og skila eftirfarandi fylgigögnum til móttökusjóðs, sem er að jafnaði sá sjóður sem síðast var greitt til.
- Samningur um skiptingu ellilífeyrisréttinda
- Heilbrigðisvottorð einstaklings, frá lækni
- Sambúðar- eða hjúskaparsöguvottorð, sem hægt er að nálgast hér
Rétt er að benda á að þegar áunnum lífeyrisréttindum hefur verið skipt er sú skipting endanleg og gengur ekki til baka þegar annar aðili fellur frá. Annað gildir um skiptingu lífeyrisgreiðslna.
