Tilgreind séreign

Til að setja hluta af lágmarksiðgjaldi í tilgreinda séreign, þarf sjóðfélagi að veita Festu lífeyrissjóði upplýst samþykki sitt. 

• Allt iðgjald til lágmarkstryggingaverndar fer í samtryggingardeild nema sjóðfélagi óski eftir að því allt að 3,5% verði ráðstafað í tilgreinda séreign.
• Mikilvægt er að sjóðfélagar geri sér grein fyrir að réttindi í samtryggingardeild geta falið í sér verðmæt tryggingaréttindi.
• Með ráðstöfun iðgjalds í tilgreinda séreign ávinnst ekki, hvað þau iðgjöld snertir, réttur til ævilangs ellilífeyris, né örorku- og makalífeyris með framreikningi heldur byggir sjóðfélagi upp sjóð sem er séreign viðkomandi.
• Sjóðfélagi þarf að taka upplýsta ákvörðun um ráðstöfun iðgjalds og tilkynna sínum  lífeyrissjóði um ráðstöfun iðgjaldsins.
• Sjóðfélagi má hvenær sem er breyta því hvernig hann ráðstafar iðgjaldi umfram 12%.
• Festa býður upp á tvær sparnaðarleiðir í tilgreindri séreign. Sjá nánar um fjárfestingarstefnu þeirra.
• Hægt verður að byrja að taka út tilgreindan séreignarsparnað fimm árum fyrir hefðbundinn lífeyristökualdur (þ.e. frá 62 ára aldri), en ekki við 60 ára aldur eins og gildir um viðbótarlífeyrissparnað.
• Tilgreindan séreignarsparnað er hægt að nýta til að safna skattfrjálst við fyrstu húsnæðiskaup eða til að greiða skattfrjálst niður húsnæðislán vegna fyrstu íbúðarkaupa samkvæmt ákveðnum skilyrðum.
• Tilgreind séreign erfist.

Hér á síðunni má finna tengil á rafræna umsókn.  Þar er hægt að  sækja um að það iðgjald sem er umfram 12%, verði ráðstafað að hluta eða öllu leiti í tilgreinda séreign. Til að nýta þennan möguleika, þarf viðkomandi að vera með rafræn  skilríki.

Hafi sjóðfélagi ekki orðið sér út um rafræn skilríki, má finna eyðublað hér á síðunni sem er tilkynning sjóðfélaga varðandi ráðstöfun iðgjalds í tilgreinda séreign. Nauðsynlegt er að prenta út tilkynninguna, fylla hana út og senda lífeyrissjóðnum frumrit hennar, til að veita upplýst samþykki sitt fyrir ráðstöfun  tilgreindrar séreignar.

Á umsóknareyðublaðinu er að finna ítarlegar upplýsingar um tilgreindu séreignina og hvaða þættir það eru sem sjóðfélagi þarf að líta til áður en hann tekur ákvörðun um hvernig hann vill ráðstafa iðgjaldinu.

Sjóðfélaga er heimilt að ráðstafa því iðgjaldi sem hann velur að renni í tilgreinda séreign, að hluta eða öllu leiti, til annars vörsluaðila lífeyrissparnaðar. Hér á síðunni má finna eyðublað sem er tilkynning sjóðfélaga varðandi ráðstöfun iðgjalds til annars vörsluaðila lífeyrissparnaðar.

Allar frekari upplýsingar veitir starfsfólk Festu lífeyrissjóðs í síma 420-2100. Jafnframt er hægt að senda fyrirspurnir á netfangið festa@festa.is.